KEANE-DAWES
Me dear mam,
De other day me buck up dis yardie man a foreign. Inna deep distress but a put de best outside. Suh when me ask him wah wrong, him mek me know seh de other day him g'a dactah an after de dactah soun him. Dactah promptly mek him know seh him hab a condition an de condition a go kill him anytime. Frighten, yardie gi out: "A cancer sar?" "No", dactah ansah. "But it a go kill yu anytime."
An before poor yardie coulda gadder him bearings wid dis ya helleba execution news, de wicked broad head, buff farid, hugly brute of a gorilla monkey dactah, neva do a ting more dan step out a de room leffing yardie siddung up pon de bed front. Tun fool till him helpless. Inna de backless floral gown well knot up two time fe safety roun a him neck back.
Well yardie get a second opinion. An de condition reverse. Now, him a step like cock chicken, for him hab hope. Dis like some pickney fram dung a Riverton City, weh Father Richard Albert, some church people from New York, an a missionary name Curt Herge a gi dem through an organisation name Jamaica Advantage through Sport for Youth (JASY). Me dear mam, dem a expose de pickney dem, from 10-14 year old, to positive people an better way a living, an a mek dem know seh dem a smady. For Massa God know dem by name. An nuh ask if de pickney dem nuh feel good!
lilly pickney
My dear lady, when me was a lilly pickney, me grow a Myrie Lane off Spanish Town Road. A place weh plenty people, maybe rightfully so, condemned as bad area an ghetto. But although me parents bring we up well an used to tell we seh education an mannas we carry we a far way. It click, but neva really click until me tek sick fe bout two week an couldn't g'a school. Me dear mam, me deh a yard de day when me hear one excitement seh car drive up de lane an stop a gate. Car? Weh car a do a we gate? When a ongle Amos an him ben hawn bicycle we used to? Missis, a nayly drap dung inna mama tie head when de heap a dawg begin run fram under de cellar wid one heap a noise!
shame
Tunning de fowl coob inna one uproar! When me peep through de windah, nuh Father William Murray (dis like Father Albert) an one a me teacha fram school! Claim seh dem a come look fe me! Meanwhile, bout one million lef an right foot a dutty slippas bungle up pon de step. An visita a come een! Well, shame a weh me lib neva lass too long. Because dat day, pon dat verandah, when me hear how much dem believe inna me. An how dem neva waan me drap out a school for me hab a bright future, it click inna me head seh weh me parents a preach to me, a true.
Suh me dear mam, JASY hab a camp in a June next year when, life spare, me suppose fe come talk to dem. Suh if yu can help sponsor a little pickney fe as little as eleven dallah, do it. An if yu tawt a tell yu seh, yuself deh ya waan sponsor. Or, dem can siddung pon dem rump an expect yu fe mine dem. Hush. Buy one less patty an help. Suh go pon de website www.jassy.com or email Mr. Herge at curt.herge@gmail.com. Yu woan lose a ting, except little weight. Y'a go feel good cause helping a pickney a de right ting fe do. Plus, Massa God seh when yu give to de poor, yu lend to Him. An Him a go pay yu back. Proverbs19:17. Awright? Suh sponsor an mek me know.
Tek care!
Dr Jennifer Keane-Dawes has been appointed Interim Dean of the School of Graduate Studies at the University of Maryland Eastern Shore, a constituent institution of the University of Maryland System. Send your email to: jkd876@yahoo.com.